ఈ ప్రశ్నకు బదులేదీ ?

జరజర మంటూ పరుగులు పెడుతూ...
బిరబిర మంటూ నట్టింటను చేరి...
కంటి ముందరే మా యింటిని కూల్చి...
మా బ్రతుకు పుట్టెను నట్టేట ముంచే...
కాళరాత్రిలో కరాళ నృత్యం ...!
కృష్ణవేణమ్మే చేసె ఈ అకృత్యం ...!!

ఇన్నాళ్ళూ మా దప్పిక తీర్చి ...
మా పంటకు జవజీవాన్నిచ్చి...
మా బతుకుని మింటకు చేర్చి...
కన్నతల్లిలా మము ఏమార్చి...
ఎందుకమ్మా ఇంత దారుణం చేశావ్ ?
అర్ధాంతరంగా మా బతుకులనే మింగేశావ్ ?

మా శోకం చూసి నీ కోపం ఆగిందా ?
మా కడుపు కోతకు నీ కక్ష తీరిందా ?
కన్నతల్లి కరుణకు కాలం చెల్లిందా ?
'అమ్మా' అనే పిలుపుకు అర్ధమే మారిందా ?


(కృష్ణవేణమ్మ జల ప్రళయ విలయ తాండవానికి... సర్వం కోల్పోయిన అనాధల గుండె లోతుల్లోని ప్రతిధ్వనికి... బాదాతప్త హృదయంతో అక్షర ఆక్రోశం...)